2015 թվականի հունիսի 1-ին կմեկնարկեն Բաթումիի Ալեքսանդր Մանթաշևի անվան կրթա-մշակութային և երիտասարդական կենտրոնի վերանորոգչական աշխատանքները:

Կենտրոնը, որը ձեռք բերվեց 2015 թվականին ՀՀ կառավարության օժանդակությամբ, հիմնանորոգվելու է Վարդան Ջինիշյանի հիշատակի հիմնադրամի նյութական ծախսերով:

Աշխատանքները վերահսկելու է Բաթումիի Սուրբ Փրկիչ եկեղեցու, Աջարիայի, Գուրիայի և Իմերեթիի հայության հոգևոր հովիվ Տեր Արարատ քահանա Գումբալյանը: Այս առիթով եռօրյա աշխատանքային այցով Աջարիա էր ժամանել Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը՝ Առաջնորդարանի վարչա-տնտեսական աշխատանքների բաժնի տնօրեն Կարեն Երիցյանի ուղեկցությամբ:

Սրբազան Հայրը՝ Առաջնորդարանի վարչա-տնտեսական բաժնի տնօրենի և տեղի մասնագետների հետ դիտեց և քննարկեց կատարվելիք աշխատանքների ծավալները, աշխատանքների իրականացման ժամանակահատվածը և ավարտման ժամկետը:

Այցի շրջանակներում նաև հանդիպում կայացավ Բաթումի Ալեքսանդր Մանթաշևի անվան կենտրոնի ղեկավար Սոնա Հովհաննիսյանի հետ, ում հետ քննարկվեցին կենտրոնի գալիք աշխատանքների ծրագրերը: Ինչպես տեղեկացրեց տիկին Սոնան, կենտրոնում գործելու են նախակրթարան, հայերենի ուսուցման շաբաթօրյա և կիրակնօրյա դպրոցներ, երգչախումբ, պարի խմբակ, գեղագիտական դաստիարակության խմբակ, սոցիալական ծառայություն, երիտասարդական բաժին: Տարվա ընթացքում խմբակների սաների ուժերով տեղում կկազմակերպվեն մշակութային տարբեր միջոցառումներ:

Առաջնորդը բարձր գնահատեց Տեր Արարատ քահանա Գումբալյանի և Բաթումիի հայ համայնքի նվիրյալ այրերի աշխատանքները:

Վիրահայոց թեմի առաջնորդը, ուղեկցող անձանց հետ միասին, եղավ նաև Բաթումիում ՀՀ Գլխավոր հյուպատոսությունում, որտեղ գլխավոր հյուպատոս Արամ Գրիգորյանի հետ քննարկվեցին կենտրոնի, հոգևոր հովվության և հյուպատոսության համատեղ աշխատանքները: