Ապրիլի 20-ին Ջավախքի Կուլիկամ գյուղում տեղի ունեցավ Հայոց Ցեղասպանության զոհերի հիշատակի հուշակոթող-խաչքարի բացման արարողությունը:

Սուրիկ Մարաբյան բարերարարի ու հայրենասերի հովանավորությամբ Ջավախք աշխարհի այս գողտրիկ անկյունում կանգնեցվեց 1915-ին նահատակների հիշատակը հավերժացնող Խաչքարը:

Խաչքարն օծվեց ձեռամբ Սամցխե-Ջավախք և Ծալկա տարածաշրջանի առաջնորդական փոխանորդ Տեր Բաբգէն վրդ Սալբիյանի և մասնակցությամբ Ախալքալաքի և շրջակա գյուղերի հգևոր հովիվ Տեր Տաթև քահանա Մարուքյանի:

«Կուլիկամցիներն ունենալով Սուրիկ Մարաբյան բարերարին, կանգնեցրին այս խաչքարը: Խաչքար, որն անընդհատ հիշեցնելու է Հայոց Ցեղասպանության բյուր նահատակներին: Մատաղ սերունդներին հիշեցնելու է հայրենազուրկ եղած հային»,- իր խոսքում ասաց Ջավախքի հոգևոր առաջնորդը:

Պատմական այս իրողությանը հաջորդեցին Կուլիկամի Արթուր Ղարիբյանի անվան միջնակարգ դպրոցի սաների գրական-գեղարվեստական կատարումները: Առատ տեղացող ձյունը չխանգարեց Կուլիկամի պարային խմբին հիանալի ներկայացնել հայկական պարերը:

Խաչքար-հուշակոթողի բացման պատմական արարողությանը ներկա էին հյուրեր Հայաստանից, Վրաստանից, Ախալքալաքի իշխանության ներկայացուցիչները, Վրաստանի խորհրդարանի հայազգի պատգամավորը, մշակույթի գործիչներ և այլք: