|
Լուրեր
|
|
2018 թվականի նոյեմբերի 26-ին Վիրահայոց թեմի Բաթումիի Սուրբ Փրկիչ եկեղեցի այցելեցին Վրաստանում ԱՄՆ-ի դեսպանության քաղաքական հարցերով պատասխանատու Խուան Խոսե Ապարիսիոն և քաղաքական հարցերի մասնագետ, միջազգային հարաբերությունների դոկտոր Մեդեա Քոչորաձեն:
Բաթումի Սբ. Փրկիչ եկեղեցու հոգևոր հովիվ արժ. Տեր Արարատ քհն. Գումբալյանը ողջունելով հյուրերին, ներկայացրեց հայոց եկեղեցու, ի մասնավորի 19-րդ դարի կառույց Սուրբ Փրկիչ եկեղեցու պատմությունը, ծանոթացրեց ծիսա-արարողակարգի առանձնահատկություններին, նաև խոսեց համայնքային գործունեության ուղղությունների մասին , կարևորեց բաթումահայ համայնքի երկրի քաղաքացիական հասարակայնությանը ինտեգրվելու ուղղությամբ տարվող աշխատանքները: Հոգևոր հովիվը երախտագիտությամբ ընդգծեց երկրի իշխանությունների վերաբերմունքը հայ համայնքի նկատմամբ, պատմեց Բաթումիի վրացական դպրոցում ուսումնական տարվա սկզբից գործող հայ-վրացական ուսուցմամբ դասարանի մասին, որտեղ հայերենը դարձել է պարտադիր: Տեր Արարատը ԱՄՆ-ի դեսպանության պատասխանատուի հետ զրույցում շոշափեց նաև եկեղեցուն հուզող հարցերը, որոնցից մեկը եկեղեցուն կից հողակտորը տրամադրելու մասին էր, նաև բաթումահայերին մտահոգող այլ հարցեր:
Այնուհետև հյուրերը, Տեր Արարատի ուղեկցությամբ, տեղափոխվեցին Թեմի Ալեքսանդր Մանթաշյանց կենտրոն: Կենտրոնի ղեկավար Սոնա Հովհաննիսյանը հյուրերին ծանոթացրեց այն բազմակողմանի աշխատանքների հետ, որոնք իրականացվում են ծովափնյա այս բազմազգ քաղաքում հայկական մշակույթը, արժեհամակարգը պահպանելու և զարգացնելու ուղղությամբ:
Կենտրոնում ցուցադրվեց տեսաֆիլմ՝ նվիրված դարեր շարունակ այս քաղաքում հաստատված բաթումահայերին, Հայոց Եկեղեցուն, ինչպես նաև կրթամշակութային կենտրոնի գործունեությանը:
Հյուրերի պատվին Ալեքսանդր Մանթաշյանց կենտրոնի սաները հանդես եկան երգով և պարով: Ամերիկացի և վրացի քաղաքագետները բարձր գնահատեցին Հայոց Եկեղեցու և մշակութային կենտրոնի գործունեությունը, տպավորվեցին ազգային մշակույթի և լեզվի պահպանմանը միտված միջոցառումներից:
|
