Այս տարի ևս թբիլիսահայ երիտասարդների խումբը ամառային հանգսստի երկու շաբաթը գերադասեց անցկացնել սկաուտական ճամբարում, որը ՀԲԸՄ երիտասարդական ծրագրերի շրջանակներում արդեն 8-րդ տարին անընդմեջ կազմակերպվում է ՀՀ Լոռու մարզի Լերմոնտովո գյուղի անտառային հովտում: 2015 թվականի հուլիսի 10-ին թբիլիսահայ երիտասարդների խումբը Վիրահայոց թեմի «Հայարտուն» կենտրոնի ղեկավար Լևոն Չիդիլյանի գլխավորությամբ ժամանեց ճամբար: Վիրահայոց թեմի երիտասարդական բաժնի (տնօրեն՝ Վալերի Բադալյան) ակտիվիստ 11 տղաներ ու աղջիկներ, Հովհաննես Շահնազարյանի ղեկավարությամբ, 12 օր գտնվում էին «Անդրանիկ» սկաուտական ճամբարում, վայելելով վրանային կյանքի հաճույքը:

Ճամբարում հավաքվել էին 120 հայ երիտասարդներ Լիբանանից, Իրաքից, Դուբայից, Թբիլիսիից, Երևանից և այլ երկրներից ու քաղաքներից: Սկաուտական «Անդրանիկ» ճամբարի բացումը օրհնեց և բարի գործունեություն մաղթեց Հայ Առաքելական Սուրբ Եկեղեցու Գուգարաց Թեմի Առաջնորդ Գերաշնորհ Տեր Սեպուհ արքեպիսկոպոս Չուլջյանը:

Ուրախ և հետաքրքիր էր անցնում սկաուտական առօրյան. այն սկսվում էր առավոտյան մարզանքով ու դրոշակի բարձրացման արարողությամբ, այնուհետև վրանի և տարածքի մաքրություն, արշավներ, դասախոսություններ, խաղեր, իսկ երեկոյան երգ ու պար խարույկի շուրջ, կրկին դրոշակի արարողություն և ննջապարկերով անուշ քուն: Կյանքն այստեղ այնքան գայթակղիչ ու զվարճալի է, որ թբիլիսահայ երիտասարդներից շատերը «Անդրանիկ» ճամբար էին ժամանել երկրորդ, երրորդ և չորրորդ անգամ:

2008 թվականին ստեղծված «Անդրանիկ» սկաուտական ճամբարը տարեցտարի ընդարձակվում է, ընդգրկվում են ավելի շատ երկրներ:Սկաուտական ճամբարներում մեկ հարկի տակ հավաքվում են սփյուռքահայ երիտասարդները, շփվում և կապեր հաստատում իրենց հասակակիցների հետ:

Հայաստանում անցկացրած օրերը անմոռանալի դարձան նաև այցելությամբ Կոմիտասի, Անդրանիկ Օզանյանի տուն-թանգարաններ Գյումրիում, Մայր Աթոռ Սուրբ Էջմիածին, Հաղարծին, «Գոհար» համույթի համերգին : Սեպուհ Սրբազանի հրավերով «Անդրանիկ» ճամբարը հյուրընկալվեց Գուգարաց թեմի « Ծիծեռնակ» ճամբարում: Երիտասարդները մասնակցեցին Հայոց Ցեղասպանության 100-րդ տարելիցի հիշատակի միջոցառմանը:

Ճամբարային կյանքի ավարտին նվիրված ավանդական խարույկի շուրջը Վիրահայոց թեմի երիտասարդական բաժինը ներկայացրեցին Անի Ղուշչյանը և Հովհաննես Շահնազարյանը: ՀԲԸՄ հայ երիտասարդաց ընկերակցության վարիչ-տնօրեն Գևորգ Սանթուրյանը բարձր գնահատեց թբիլիսյան ջոկատի մասնակցությունը և տիպար սկաուտ անվանեց Գևորգ Ավետիսյանին: Ճամբարի մասնակից սկաուտները հրաժեշտ տվեցին միմյանց` հաջորդ տարի կրկին հանդիպելու ակնկալիքով: