28 თებერვალს მთავარ საკათედრო „სურბ ეჯმიაწინში“ ყოველთა სომეხთა კათოლიკოსმა უწმინდესმა და უნეტარესმა გარეგინ II-მ მიიღო საქართველოს პრეზიდენტი ბატონი გიორგი მარგველაშვილი, სომხეთის რესპუბლიკის საგარეო საქმეთა მინისტრის - ედვარდ ნალბანდიანის, თანხლებით. შეხვედრას ესწრებოდნენ მთავარ საკათედრო წმიდა ეჯმიაწინის კანცელარიის მმართველი ეპისკოპოსი არშაკ ხაჩატრიანი, საქართველოს სომეხთა ეპარქიის წინამძღვარი ეპისკოპოსი ვაზგენ მირზახანიანი, მთავარ საკათედრო წმიდა ეჯმიაწინის ადმინისტრაციულ-სამეურნეო დეპარტამენტის დირექტორი ეპისკოპოსი მუშეღ ბაბაიანი.

ყოველთა სომეხთა კათოლიკოსმა მიესალმა რა საქართველოს პრეზიდენტისა და მისი თანმხლები დელეგაციის ვიზიტს სომხეთსა და ხაზი გაუსვა იმავე რეგიონში ერთმანეთის გვერდიგვერდ მცხოვრები ორი თანამორწმუნე ხალხების თანაარსებობისა და ძმობის გაძლიერების მნიშვნელობას, რაზეც ყოველთვის მიმართული იყო სომეხთა ეკლესიის ძალისხმევა.

 შეხვედრისას ისაუბრეს ასევე საქართველოს სომხურ სათვისტომოზე და მის ისტორიულ და ახლანდელ დიდ წვლილსა და როლზე ქვეყნის ეკონომიკურ, კულტურულ, საგანმანათლებლო და სხვა ასპექტებში. თავის სიტყვაში ყოველთა სომეხთა კათოლიკოსმა კმაყოფილება გამოთქვა საქართველოს სომეხთა ეპარქიისა და სომხური სათვისტომოს საეკლესიო საკითხთა მოგვარების მიმართულებით ბოლო პერიოდში დაწყებულ დადებით პროცესებთან დაკავშირებით და ღრმა რწმენა გამოთქვა , რომ ეს ყველაფერი წარუძღვება სომეხი ერის შვილების სულიერი ცხოვრების პრობლემათა სრულ გადაწყვეტას.

დასასრულს უწმინდესმა და უნეტარესმა ნაყოფიერი მოღვაწეობა უსურვა ბატონ გიორგი მარგველაშვილს, საქართველოსა და მისი მორწმუნე ხალხის საკეთილდღეოდ.

შეხვედრის შემდეგ, საქართველოს პრეზიდენტმა მოინახულა მთავარი საკათედრო ტაძარი, ეწვია ტაძრის მუზეუმს.

მთავარ საკათედრო წმიდა ეჯმიაწინის პრესსამსახური