|
Լուրեր
|
|
Հանգամանալից քննարկումներից հետո մշակված գործնական պլանի համաձայն մեկնարկեցին Վիրահայոց թեմի երիտասարդական բաժնի նախաձեռնությամբ և «Ջինիշյան հիշատակի հիմնադրամի» կողմից ֆինանսավորվող «Քաղաքացիական երկխոսություն և փորձնական քայլեր փոփոխությունների համար 2018-2019թթ» նախագծով միջոցառումները:
2019 թվականի հունվարի 25-ին Վիրահայոց թեմի «Հայարտուն» կենտրոնի Գալուստ Գյուլբենկյան սրահում կայացավ հանդիպում Վրաստանի ներքին գործերի նախարարության մարդու իրավունքների պաշտպանության դեպարտամենտի տնօրեն Լոնդա Թոլորաիայի հետ:
Դեպարտամենտի տնօրենը հանգամանալից խոսեց մարդու համապարփակ իրավունքների մասին, առանձնապես կարևորեց անչափահասների իրավունքները և կանանց նկատմամբ բռնությունը: Ներկաներին ընձեռվեց հարցեր ուղղելու և հետաքրքրող տեղեկությունը ստանալու հնարավորություն:
Հանդիպումը ստացավ նաև գործնական զարգացում: Ուսանողները Լոնդա Թոլորաիայի հետ միասին որոշեցին իրականացնել այլ նախագծեր, որոնց ներգրավված կլինեն նաև Վրաստանում բնակվող ազգային փոքրամասնությունների ներակայացուցիչները:
Հաջորդ հանդիպումը, որը կայացավ հունվարի 27-ին «Հայարտուն» կենտրոնում, նույն նախագծի շրջանակներում «Լիվինգստոն» ընկերության բջջային ապլիկացիաների դեպարտամենտի ղեկավար Միրիան Խոմերիկիի հետ էր: Վերջինս հանդիպման մասնակիցներին ներկայացրեց բջջային ապլիկացիաների ստեղծման գործընթացը՝ գաղափարից մինչև դրա ավարտը: Նրանք միասին քննարկեցին նաև տարբեր նախագծերի բյուջետավորմանը, ծրագրավորմանը, զարգացմանը, գնահատմանը և հանձնմանը վերաբերող թեմաները:
Պարոն Խոմերիկին խաղերի միջոցով մասնակիցներին առավել հստակ ցույց տվեց նախագծի ստեղծման փուլերը և գործընթացը: Մասնակիցները հանդիպման ավարտին կիսվեցին իրենց գաղափարների մասին և որոշեցին դրանք իրականացնել վերոնշյալ նախագծի շրջանակներում:
«Ջինիշյան հիշատակի հիմնադրամի» կողմից ֆինանսավորվող «Քաղաքացիական երկխոսություն և փորձնական քայլեր փոփոխությունների համար 2018-2019թթ» նախագծի շրջանակներում նախանշված միջոցառումները շարունակական են:
|
