ბათუმის სომხურმა სათვისტომომ, ადგილობრივი „სურბ ფრკიჩ“ ("წმინდა მაცხოვრის") ეკლესიის სულიერი მოძღვრის, მღვდელ არარატ გუმბალიანის ინიციატივით, 7 ივნისს ბათუმის მე- 9 სკოლაში ჩაატარა საიათნოვას „ვარდატონის“ 100 წლის იუბილესადმი მიძღვნილი საზეიმო ღონისძიება.

ღონისძიებაში სკოლის მოსწავლეებთან ერთად მონაწილეობა მიიღეს ეკლესიის კულტურულმა წრეებმა. საიათნოვას სიმღერების მშვენიერი შესრულებებით გამოვიდა „სურბ ფრკიჩ“ ეკლესიის „აღბიურ“ საბავშვო გუნდი (ქორმაისტერი: რუზანა ჰოვანისიანი). სომხურ და ქართულ ენებზე წაკითხული ლექსებით ღონისძიება დაამშვენეს ბათუმის „სურბ მესროპ მაშტოც“ საკვირაო სკოლის მსმენელებმა (მასწავლებელი: სონა ჰოვანისიანი), სომხური ცეკვების ლამაზი შესრულებით გამოვიდა „ჰეღნარ“ ქორეოგრაფიული ანსამბლი. ზეიმის სამხატვრო ხელმძღვანელობა ეკუთვნოდა მე-9 სკოლის მასწავლებელ სათენიკ დანიელიანს.

დარბაზში ადგილები ეკავათ სკოლის დირექციას, მშობლებს, სტუმრებს. ღონისძიებას ესწრებოდა აჭარაში, გურიასა და იმერეთში სომხეთის რესპუბლიკის გენერალური კონსული არამ გრიგორიანი.

ცერემონიის დასასრულს საქართველოს სომეხთა ეპარქიის წინამძღვარმა, მისმა უსამღვდელოესობამ ეპისკოპოსმა ვაზგენ მირზახანიანმა აკურთხა დამსწრეები და მონაწილეები. დარბაზი მორთული იყო საიათნოვას საყვარელი და „ვარდატონის“ სიმბოლოდ გამოცხადებული ულამაზესი წითელი ვარდებით, ენთო სანთლები. ეპიზოდებით წარმოდგენილი იყო ანასა და საიათნოვას სიყვარულის ლეგენდის ისტორია.

დღესასწაული დამშვენებული იყო სიყვარულის დიდი მგოსნის ლექსების ხიბლით, სუფევდა უკვდავი მეგობრობის ატმოსფერო.