|
Լուրեր
|
|
Հիսուս Քրիստոսի Անվանակոչության տոնը Հայաստանյայց Առաքելական Սուրբ Եկեղեցին տոնում է Փրկչի Ծննդից ութ օր հետո՝ հունվարի 13-ին:
2019 թվականի հունվարի 13-ին տոնական օրվա առիթով, Վիրահայոց թեմի եկեղեցիներում մատուցվեց Սուրբ և Անմահ Պատարագ:
Վիրահայոց թեմի Սամցխե-Ջավախքի և Ծալկայի ընդհանուր առաջչնորդական փոխանորդության Ախալքալաքի Սուրբ Խաչ եկեղեցում Սրբազան Պատարագ մատուցեց Թեմի առաջնորդ Գերաշնորհ Տեր Վազգեն եպիսկոպոս Միրզախանյանը: Պատարագին հավատացյալ ժողովրդի հետ միասին ներկա էին Ախալքալաքի շրջանային ժողովի նախագահ Նաիրի Իրիցյանը և Ախալքալաքի փոխքաղաքապետ Արմեն Մառանգոզյանը:
Հընթացս Սուրբ Պատարագի՝ Սրբազան Հայրը հավուր պատշաճի քարոզ խոսեց օրվա խորհրդի մասին և շնորհավորեց ու բարեմաղթանքներ փոխանցեց հավատացյալներին Սուրբ Ծննդյան և Հիսուսի Անվանակոչության տոների առիթով:
Հավարտ Սուրբ Պատարագի՝ ձեռամբ Գրշ. Տեր Վազգեն եպիսկոպոսի, կատարվեց Դիլիսկա գյուղի Սուրբ Սարգիս եկեղեցու համար պատրաստված Սրբոց Նահատակաց սրբապատկերի օծման հանդիսավոր արարողությունը: Թեմակալ առաջնորդը Սուրբ Մյուռոնով օծեց պատկերի 4 անկյունները, որից հետո պահպանիչ աղոթքով օրհնեց սրբապատկերի բարերար Կարապետ Մոսոյանին և հավատացյալներին:
Սրբապատկերի օծման ավարտից հետո հավատացյալները մոտեցան ատյանին և երկրպագեցին նորաօծ սրբապատկերին:
Պատարագից հետո փոխանորդության առաջնորդարանում կազմակերպվեց ընդունելություն:
Հունվարի 13-ը տոնական Պատարագներով նշվեց Վիրահայոց թեմի Թբիլիսիի, Բաթումի, Ախալցիխեի, Նինոծմինդայի, Ռուսթավիի և Մառնեուլիի շրջանի հայոց եկեղեցիներում:
|
