2017 թվականի մայիսի 4-11-ը դարձան Վիրահայոց թեմի Բաթումի «Սուրբ Փրկիչ» եկեղեցու մի խումբ հավատացյալների կյանքի ամենաերջանիկ և անմոռանալի օրերը: Թվով 18 բաթումահայեր, ստանալով Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի օրհնությունը, Բաթումի«Սուրբ Փրկիչ» եկեղեցու, Աջարիայի, Գուրիայի և Իմերեթիի հայության հոգևոր հովիվ արժանապատիվ Տեր Արարատ քահանա Գումբալյանի գլխավորությամբ, ուխտի մեկնեցին Երուսաղեմ: Ուխտագնացությունը շարունակվեց 7 օր, դառնալով նրանցից յուրաքանչյուրի աստվածատենչ երազանքի իրականացում:

2017 թվականի մայիսի 2-ից, Վիրահայոց թեմի առաջնորդարանի նախաձեռնությամբ և հովանավորությամբ, Թբիլիսիի «Սուրբ Մովսես Խորենացի» նախակրթարանում ավելացավ երեխաների գտնվելու տևողությունը: Երեխաների օրը նախակրթարանում այսուհետ մեկնարկում է առավոտյան ժամը 9-ն անց 30-րոպեից և ավարտվում ժամը 16-ն անց 30 րոպեին:

2017 թվականի ապրիլի 30-ին, Վիրահայոց թեմի Նինոծմինդայի «Ռաֆայել Ջավախ» կրթա-մշակութային և երիտասարդության կենտրոնում տեղի ունեցավ «Սովորիր ժողովրդիդ պատմությունը» խորագրով ինտելեկտուալ խաղի եզրափակիչ փուլը: Խաղին ընդգրկվել էին կենտրոնի հայ ժողովրդի պատմության ( ուսուցիչ՝ Սամվել Փութուլյան), կրոնի (ուսուցիչ՝ Ռիմմա Սահակյան) և արվեստի պատմության (ուսուցիչ՝ Ժորա Սնխչյան) խմբակների 30-ից ավելի սաներ:

2017 թվականի ապրիլի 30-ին Վիրահայոց թեմի «Հայարտուն» կենտրոնի Գալուստ Գյուլբենկյան սրահում կայացավ «Պոետի վերադարձը» վավերագրական ֆիլմի ցուցադրությունը: Ֆիլմի ռեժիսոր, «Ոսկե ծիրան» միջազգային փառատոնի հիմնադիր-տնօրեն Հարություն Խաչատրյանը վաղուց էր սպասում Թբիլիսիում այս ֆիլմի ցուցադրությանը և կինոյի թբիլիսահայ երկրպագուների հետ հանդիպմանը: Սակայն տկարության պատճառով ֆիլմի բեմադրող-ռեժիսորը չկարողացավ Թբիլիսի ժամանել և ներկա գտնվել «Ջիվանուն և Ջավախքին» նվիրված ֆիլմի ցուցադրությանը: