2017 թվականի ապրիլի 8-ին, Վիրահայոց թեմի «Հայարտուն» կենտրոնի Գալուստ Գյուլբենկյան սրահում կայացավ դասախոսություն «Հայկական Երուսաղեմ» թեմայով: Մեծ Պահքի այս օրերին Երուսաղեմի Սուրբ վայրերը, ի մասնավորի «Հայկական թաղամասը» դասախոսությամբ առավել հանգամանալից ներկայացնելու Երևանի Սերգո Փարաջանովի տուն-թանգարանի հիմնադիր-տնօրեն, արվեստագետ և լուսանկարիչ՝ Զավեն Սարգսյանի մտադրությունը թբիլիսահայերի կողմից ընդունվեց մեծ գոհունակությամբ և խորին երախտագիտությամբ:

2017 թվականի ապրիլի 9-ին ողջ քրիստոնյա աշխարհը նշեց Ծաղկազարդը՝ Հիսուս Քրիստոսի հաղթական մուտքը Երուսաղեմ: Հայ Առաքելական Ուղղափառ Սուրբ Եկեղեցու Վիրահայոց թեմի գործող եկեղեցիներում տոնի կապակցությամբ մատուցվեց Սուրբ և Անմահ Պատարագ:

2017 թվականի ապրիլի 9-ին, Վրաստանում նշվեց ազգային միասնության օրը: Վիրահայոց թեմի պաշտոնեությունը, թբիլիսահայ համայնքի ներկայացուցիչները, Թեմակալ առաջնորդ Գերաշնորհ Տեր Վազգեն եպիսկոպոս Միրզախանյանի գլխավորությամբ, այցելեցին 1989 թվականի ապրիլի 9-ին, Վրաստանի անկախության համար զոհվածների հիշատակին Վրաստանի խորհրդարանի շենքի առջև կանգնեցված հուշակոթողին:

2017 թվականի ապրիլի 7-ին, Վիրահայոց թեմի Թբիլիսիի Սուրբ Գևորգ առաջնորդանիստ եկեղեցում, երեկոյան ժամերգությանը նախորդեց Ավետման տոնին, ի մասնավորի մայրության և գեղեցկության օրվան նվիրված գողտրիկ միջոցառումը: