2015 թվականի հունիսի 1-ին, Երեխաների պաշտպանության միջազգային օրը, Թբիլիսիի Նոդար Դումբաձեի անվան պատանի հանդիսատեսի պետական թատրոնում, կայացավ հանդիպում մայրաքաղաքի Իսանի շրջանի սոցիալապես անապահով ընտանիքների երեխաների հետ: Երեխաների տոնը շնորհավորելու էին եկել Վրաստանի խորհրդարանի անդամներ Ռուսլան Պողոսյանը, Իլիա Ջիշկարիանին , Իսանի շրջանի գամգեբելի Վախտանգ Քիզիղուրաշվիլին, Իսանի շրջանային բյուրոյի ղեկավար Նինո Կվարացխելիան, բյուրոյի անդամներ Պավլե Նադիբաիձեն, Նանա Ամիրեջիբին, Մամուկա Գոգսաձեն շրջանային պիար-ծառայության պետ Էլենե Դադիանին և ուրիշներ:

2015 թվականի հունիսի 8-ին, Թբիլիսի էր ժամանել Հայաստանի գրողների միության նախագահ Էդվարդ Միլիտոնյանը՝ գրողների միության պատվիրակության ուղեկցությամբ: Այցի նպատակը Հովհաննես Թումանյանի թբիլիսյան բնակարանը ամբողջական տեսքով Վիրահայոց թեմին փոխանցելն էր: Հյուրերը «Հայարտուն» կենտրոնում Կոմիտասին նվիրված ցուցահանդեսը դիտելուց հետո, այցելեցին Խոջիվանքի հայ գրողների և հասարակական գործիչների պանթեոն և ծաղիկներ խոնարհեցին Ամենայն հայոց բանաստեղծ Հովհաննես Թումանյանի շիրիմին և ազգի մյուս մեծամեծների տապանաքարերին:

2015 թվականի հունիսի 7-ին, Հայ Առաքելական Սուրբ Եկեղեցին տոնեց Կաթողիկե Սբ. Էջմիածնի տոնը: Վիրահայոց թեմում այն նշանավորվեց Թբիլիսիի Սուրբ Էջմիածին եկեղեցում, Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի հանդիսապետությամբ և հոգևոր դասի մասնակցությամբ, մատուցված Սուրբ և Անմահ Պատարագով, որի Պատարագիչն էր Տեր Մանուկ քահանա Զեյնալյանը:

2015 թվականի հունիսի 6-ին Ախալցիխե էին ժամանել ուխտավորների խմբեր Թբիլիսիից, Նինոծմինդայից և Ախալքալաքից՝ «Սուրբ Գրիգորի Լուսաւորչին մերոյ ելն ի Վիրապէն» տոնին մասնակցելու համար: Քաղաքի Սուրբ Գրիգոր Լուսավորիչ եկեղեցում տոնական Պատարագ մատուցեց Տեր Հակոբ աբեղա Սահակյանը, իսկ հավուր պատշաճի քարոզ խոսեց Սամցխե-Ջավախքի և Ծալկայի ընդհանուր առաջնորդական փոխանորդ Տեր Բաբգէն վարդապետ Սալբիյանը, ով արծաթյա գեղեցիկ խաչ նվիրեց եկեղեցուն: Հավարտ սուրբ պատարագի հավատացյալներին առաջնորդական իր պատգամը փոխանցեց Գերաշնորհ Տեր Վազգեն եպիսկոպոս Միրզախանյանը և հանդիսապետեց նվիրաբերված խաչի օծման կարգը: Ուխտավորները շրջեցին Ախալցիխեի տեսարժան վայրերում, հյուրասիրվեցին հոգևոր դասի կողմից կազմակերպված սիրո ճաշին (ագապե) և վերադարձան իրենց բնակավայրերը: